«Shërbëtori i popullit» nga Kievi dhe shkelësi i të gjitha normave në Shtëpinë e Bardhë

«Më bëj një nder», i kërkon Donald Trumpi presidentit të Ukrainës. Dhe Volodimir Selenski bie në gjunjë: «Ju jeni një mësues fantastik, ne mund të mësojmë nga ju, kam fjetur në hotelin tuaj në New York». Një parodi politike.




Volodimir Selenski është humorist. Në serinë «Sluha narodu» (Shërbëtori i popullit) Selenski ka luajtur rolin e presidentit. Nga ky rol Selenski ka rrëshqitur në realitet: i ka fituar zgjedhjet presidenciale dhe është bërë tamam president. Shumica e votuesve ukrainas janë aq të neveritur me klasën e korruptuar politike, saqë ata e votuan Selensikin, ndonëse ky nuk kishte përvojë politike. Selenski premtoi një stil krejt tjetër politik: pa korrupsion, me transparencë. Themeloi një parti të quajtur «Shërbëtorët e popullit».

Më 25 korrik 2019 presidenti amerikan Donald Trump zhvilloi një bisedë telefonike me Volodimir Selenskin. Më parë ai u kishte dhënë urdhër ministrisë së Jashtme dhe të Mbrojtjes të ngrijnë 400 milionë dollarë të paraparë si ndihmë për Ukrainën. Pastaj Trump kapi dëgjuesin e telefonit dhe i tha homologut të tij në Kiev: «Më bëj një nder». Përkthyer në gjuhë të kuptueshme kjo domethënë: më gjej material me të cilin mund ta njollosë Joe Bidenin. I biri i tij ka punuar si këshilltar për një firmë ukrainase të gazit, drejtësia ukrainase ka zhvilluar hetime, por ato janë ndërprerë. Tash Trump kërkon që Selenski të këqyrë nëse mund të bëjë diçka. Biden ka gjasa të jetë kundërkandidat i Trumpit në zgjedhjet e nëntorit të vitit 2020. Pra, presidenti amerikan kërkon që një shtet tjetër t’i ndihmojë për të diskredituar rivalët politikë. Mesazhi është ky: unë të japë para, ti më jep dëshmi kundër të birit të Bidenit.

Sjellja e Volodimir Selenski i ngjan një roli në parodi. Selenski i thotë Trumpit: ««Ju jeni një mësues fantastik, ne mund të mësojmë nga ju, kam fjetur në hotelin tuaj në New York». Trump thotë se Gjermania nuk po bën gati asgjë për Ukrainën, Selenski ia kthen: «Keni të drejtë. Jo 100 për qind, por 1000 për qind». Selenski me sa duket e di se Trumpit i pëlqejnë superlativët. A nuk thotë Trumpi pothuaj çdo ditë se ai është presidenti më i suksesshëm i SHBA-ve? A nuk lavdërohet me sukseset e tij në biznes?

Me telefonatën e tij me Selenskin presidenti Trump e mbushi kupën. Demokratët kanë nisur procedurat për shkarkimin e tij. Në historinë amerikane vetëm tri herë deri më tani ka pasur përpjekje për shkarkim të presidentit. Me 1974 presidenti Richard Nixon iku nga posti i frikësuar se do të shkarkohej. Më 1999 dështoi nisma për shkarkimin e Bill Clintonit për shkak të aferës së tij me praktikanten Monica Lewinsky. Më 1868 Senati deshi të shkarkojë presidentin Andrew Johnson, por mungoi një votë. Johnson e kishte larguar nga posti ministrin e luftës pa pëlqimin e Senatit.

Që nga hyrja në Shtëpinë e Bardhë Trump i ka hedhur në ajër të gjitha normat etike, politike dhe morale. Në një koment të ashpër të DER SPIEGEL numërohen disa nga sjelljet e papërgjegjshme të Trumpit: ai i quan racistët «njerëz të mirë», në kufi me Meksikën i fut fëmijët refugjatë në kafaze, në poste të rëndësishme emëron anëtarë të familjes apo puthadorë, kërkon arrestimin e rivalëve politikë, pengon drejtësinë dhe një aktoreje të filmave pornografik i paguan para që ajo të heshtë për një aferë me Trumpin. Para se të bëhej president Trump ishte i gatshëm të pranojë ndihmën e Rusisë për të luftuar Hillary Clintonin gjatë fushatës elektorale. Të dëshmuara janë mbi 100 kontakte të ekipit të Trumpit dhe rusëve.

Procedura e shkarkimit bart rreziqe. Trump mund të përfitojë duke e inskenuar veten si viktimë të demokratëve. Kështu ai do të mobilizojë përkrahësit e tij. Por, edhe Joe Biden mund të dëmtohet. Ai ishte lavdëruar se i ka bërë presion Ukrainës të largojë kryeprokurorin Jurij Lucenko, i cili konsiderohej i korruptuar. Por Lucenko, i cili është shkarkuar në fund të gushtit, ka deklaruar se Biden është përpjekur të pengojë hetimet kundër firmës ukrainase Burisma për të cilën punonte i biri i Bidenit, Hunter. Lucenko po ashtu ka thënë se po hetonte nëse zyrtarë dhe politikanë ukrainas më 2016 kanë përkrahur Hillary Clintonin. Trump është kapur menjëherë pas këtij rrëfimi, sepse i mundëson të thotë: pa shihni, nuk është e vërtetë që rusët më kanë përkrahur mua, por e vërtetë është se Hillary Clinton ka marrë mbështetje nga politikanët e korruptuar ukrainas.