Shpirti i Shenjtë

Foto: Shutterstock



Për Melih Cevdet

I
Krishti europian nganjëherë është revolucionar
Nganjëherë i ndjeshëm dhe besimtar siç i shkon për terezie
Ai falë kur i shkon për shtati
Kur diçka nuk i shkon për shtati urren
Nuk e do dhunën dhe nuk ngurron ta përdorë atë

Ai mund të jetë mik dhe armik
Nganjëherë revoltohet kundër padrejtësisë
Jo gjithçka lejon të rrokulliset në hulli të vet
Por, kur është fjala për Afrikën: plaçkite

II
As përparimtar, as revolucionar nuk është Krishti amerikan
Biznesmen nga lloji i robotëve
Nuk është mëkat ta përmbysësh kundërshtarin tënd

Në kutinë e zgjedhjeve me fletëvotime
Janë të barabartë të bardhët dhe zezakët e Botës së Re
Pa guxo njëherë afrohu te kutia e zgjedhjeve
Atëherë do ta ndjesh kamxhikun e të bardhëve në zverkun tënd
Rrofshin të drejtat e njeriut
Në liri të pafundme
Jetojnë zezaku indiani dhe melezi

III
Krishti afrikan është Krishti i vërtetë
Ai nuk urren falë dhe harron
Durimi i tij është i pafundmë

Ndaj të keqit duhet të tregohemi të durueshëm
Kështu na urdhëron Zoti i bardhë
Mjerimi është stoli e tij
Mirëdashja e tij mëshira e tij dhurata e tij
Shpërblimin për këtë vuajtje brumbujt e zinj
Do ta marrin në botën tjetër
Nëse këtë provë e kalojnë falë pastërtisë së shpirtrave të tyre
Në kopshtet e parajsës
Do t’i kenë kënaqësitë hyjnore që në këtë botë nuk arritën t’i kenë
Brumbujt e zinj

Zoti i gjithëfuqishëm
Për t’i sprovuar zezakët krijoi
Padronët e bardhë

Përktheu: Enver ROBELLI