Shkakton debate monumenti në nder të kryeministrit të vrarë serb Gjingjiq

Plani i autoriteteve të qytetit të Beogradit për të ngritur një monument për të përkujtuar ish-kryeministrin e Serbisë Zoran Gjingjiq, i vrarë në vitin 2003, ka zemëruar kundërshtarët e qeverisë.

Projektuesi i monumentit dhe zyrtarë të qytetit me modelin e monumentit për Gjingjiqin. Foto: Beoinfo



Vendimi i autoriteve të Beogradit, i cili drejtohet nga Partia Progresive Serbe, për të ngritur një monument për ish-kryeministrin e vrarë Zoran Gjingjiq, i cili ishte kundërshtari kryesor politik i qeverisësve aktualë të vendit derisa u vra nga një bandë e krimit të organizuar në 2003, ka zemëruar kritikët që i akuzojnë autoritetet për hipokrizi.

«A ka mundësi që gruaja dhe fëmijët e kryeministrit të ndjerë ta ndalojnë këtë katastrofë?», thoshin komentet më të pëlqyera në Facebook për lajmin e të shtunës që njoftonte vendosjen e një memoriali për Gjingjiqin më 12 mars të vitit që vjen, me rastin e 15 vjetorit të vdekjes së tij.

«Nuk mund ta besoj që po i ngrenë atij një monument!», tha një tjetër komentues. «Të gjithë ata që vajtuan vrasjen e tij e urrenin atë kur ishte gjallë».

Monumenti në formën e një shigjete të thyer, që thuhet se simbolizon përkushtimin e Gjingjiqit për përparimin e Serbisë dhe përkujton gjithashtu vdekjen e tij të parakohshme, u zgjodh nga 40 vepra të propozuara.

«Autoritetet e qytetit donin një monument që të mos ishte klasik, por modern, njësoj siç ishte jeta e Gjingjiqit», tha për televizionin publik serb RTS, menaxheri i qytetit, Goran Vesiq.

Megjithatë, disa thanë se autoritetet aktuale, të udhëhequra nga presidenti Aleksandër Vuçiq, nuk kanë të drejtë të pretendojnë trashëgiminë e Gjingjiqit sepse ata ishin armiq të hidhur gjatë viteve 1990.

«Ky është një shembull i pastër cinizmi», tha një nga komentuesit në internet.

«Shigjeta përkulet dhe ndryshon drejtim, ndoshta sepse Gjingjiqi po rrotullohet në varrin e tij», u ankua një përdorues Twitteri.

Të tjerë komentuan dizajnin e monumentit të propozuar, duke thënë se ishte i pavend, me disa që bënë thirrje që në vend të tij të ngrihej një statujë klasike.

«Dikush po përpiqet të tallet me Gjingjiqin. Kjo është një tabelë trafiku. Është tallje të ngresh këtë si monument për një njeri që është vrarë», tha Janko Veselinoviq, një deputet dhe ish-anëtar i Partisë Demokratike të Gjingjiqit.

Menaxheri i qytetit, Vesiq, tha se ngritja e monumentit ishte ide e presidentit Vuçiq.

«Vuçiç dhe Gjingjiq nuk kishin një mendje politikisht, por Vuçiq propozoi ngritjen e një monumenti për të. Është e rëndësishme për shoqërinë tonë», tha Vesiq për RTS.

Shumë kritika u përqendruan në qëndrimin e Vuçiqit ndaj Gjingjiqit  kur presidenti aktual ishte një anëtar i Partisë Radikale Serbe ultra-nacionaliste.

Vuçiq njëherë ngjiti publikisht postera me emrin e komandantit të Ushtrisë Serbe të Bosnjës Ratko Mlladiq, i cili është në gjyq për krime lufte dhe gjenocid, në tabelën rrugore që tregonte bulevardin Zoran Gjingjiq në Beograd.

Gjingjiq u qëllua për vdekje para ndërtesës së qeverisë në Beograd më 12 mars 2003, nga Zvezdan Jovanoviq, një anëtar i «Klanit Zemun».

Në maj 2007 Jovanoviq u dënua me 40 vjet burg për vrasje.

Disa të tjerë, përfshirë Milorad Ulemek, i njohur gjithashtu si Legija, një ish-komandant i Njësisë së Operacioneve Speciale të Ministrisë së Brendshme, u dënuan gjithashtu me burg.

Gjyqtari tha se Ulemek organizoi vrasjen ndërsa Jovanoviq shkrepi armën.

(https://www.reporter.al/shkakton-debate-monumenti-ne-nder-te-kryeministrit-te-vrare-serb-djindjic/)