Presidenti rus Vladimir Putin do të vizitojë Bullgarinë në vitin 2018

Vladimir Putin ka pranuar një ftesë nga presidenti Rumen Radev për të vizituar Bullgarinë në vitin 2018, kur shënohet 140-vjetori i fundit të luftës ruso-turke.

Presidenti rus Vladimir Putin. Foto: Kremlin.ru



Zyra e shtypit e presidentit bullgar dha lajmin se ftesa drejtuar presidentit rus Vladimir Putin qe pranuar.

Dy presidentët patën një bisedë telefonike 20-minutëshe me iniciativën e palës bullgare me rastin e Ditës së Rusisë më 12 qershor, gjatë së cilës u diskutua «lidhja e thellë historike dhe shpirtërore midis popujve bullgarë dhe rusë», tha zyra e shtypit të presidentit Radevit.

Iniciuar nga Putin, të dy presidentët analizuan marrëdhëniet bilaterale tregtare dhe ekonomike, si dhe marrëdhëniet në fushën e energjisë, ku shprehën «dëshirën e ndërsjelltë për zhvillim të mëtejshëm, pa politizim dhe në bazë të përfitimit reciprok».

«Presidenti rus falënderoi presidentin Rumen Radev për kontributin e tij në zhvillimin e marrëdhënieve dypalëshe», tha deklarata në faqen e internetit të presidencës bullgare.

Data e saktë e vizitës së Putinit në vitin 2018 mbetet ende për t’u vendosur.

Ish-presidenti Georgi Parvanov, i njohur për qëndrimin e tij pro-rus, sugjeroi se 3 Marsi 2018, kohë kur Bullgaria feston çlirimin nga pesë shekuj të sundimit osman, si rezultat i luftës ruso-turke 1877-78, do të ishte një datë e përshtatshme që Putin të vizitonte vendin.

Sugjerimi për vizitën e Putinit gëzoi mbështetje edhe nga ambasadori rus në Sofje, Anatoli Makarov dhe ish-zëvendëskryeministri Denitsa Zlateva nga Partia Socialiste Bullgare.

Putin e vizitoi Bullgarinë për herë të fundit si kryeministër i Rusisë në vitin 2010, kur erdhi për të nënshkruar kontratën për pjesën bullgare të projektit të gazsjellësit South Stream me qeverinë e Bojko Borissov dhe për të diskutuar mbi projektin bërthamor Belene.

Por tre vite më pas, në 2013, Borissov e anuloi projektin Belene për shkak të mungesës së fondeve dhe South Stream ra gjithashtu në 2014, kur Putin e la pas dore pas kundërshtimeve nga Komisioni Europian për konkurrencën.

Në shkurt megjithatë, presidenti rus sinjalizoi gatishmërinë e tij për të rinovuar projektet e energjisë me Bullgarinë, pavarësisht zhgënjimit të Kremlinit për dështimin e gazsjellësit të mëparshëm.

(https://www.reporter.al/presidenti-rus-vladimir-putin-do-te-vizitoje-bullgarine-ne-vitin-2018/)