Mirë se vini në legolandin politik

Athua politikanët e VV-së dhe të PSD-së po e vërejnë se askush nuk është i interesuar të lexojë se si shahen mes vete, si ironizojnë njëri-tjetrin, si merren me dizajnët e njëri-tjetrit, si mallkojnë njëri-tjetrin? Zari është hedhur. PSD pas kuvendit në hotel duhet të dalë në fushë dhe të bind elektoratin – dhe kjo nuk do të jetë punë e lehtë. Ndërsa VV më mirë të merret me të ardhmen e saj se sa me baltosje të atyre që deri dje i lavdëronte. Asnjëra palë, as VV, as PSD, të mos kenë shpresa të mëdha se nga kjo përçarje do të dalin më të fortë se ç’ishin kur qenë bashkë.



A shkojnë bashkë socialdemokracia dhe hoteli «Bozhur»? Jo. Nuk shkojnë. «Bozhuri» me të majtën politike nuk kanë harmonizuar madje as kur në Kosovë sundonte Lidhja Komuniste dhe kur në këtë hotel e festonte vitin e ri nomenklatura komuniste. Por, socialdemokracia e re kosovare dhe hoteli «Swiss Diamond» me gjasë përputhen – së paku për aq kohë sa socialdemokracia është një etiketë që ende nuk dëshmon se çfarë përmbajtje do të ketë në tenxheren politike përtej elaborateve deklarative. Hoteli dhe partia e re përputhen edhe për një arsye tjetër, mbase kjo është kryesorja: socialdemokratët e rinj në Prishtinë qeverisin bashkë me pronarët e hotelit.

Oligarkia dhe socialdemokracia bashkë? Në një skenë politike të pastrukturuar si kjo e Kosovës çdo gjë duket e mundshme. Kur PDK brenda 5 minutave u shndërrua nga parti e majtë në parti të djathtë, përse të mos bëhen tok oligarkia dhe socialdemokracia? Sidoqoftë, ndoshta llogaritë u dalin mirë aderuesve në Partinë Socialdemokrate (PSD), atyre që braktisën VV-në për arsye që janë bërë publike dhe të tjera që mbase në të ardhmen do të bëhen publike.

PSD po hyn në një treg politik, ku nuk mungojnë parti, por mungon besueshmëria ndaj politikës dhe partive. Në këto rrethana të bindësh elektoratin për të votuar për një parti të re është punë jo e lehtë. Megjithatë, thonë se fati është me të guximshmin. Hendikepi më i madh i kryetarit të ri është se deri më tani asnjëherë nuk ka arritur vetë të korrë ndonjë sukses – as si shef i FER-it, por as pa përkrahjen e VV-së si kandidat për kryetar të Prishtinës. Po të mos ishin votat e shefit të hotelit «Swiss Diamond» sot Shpend Ahmeti nuk do të ishte kryetar i komunës së Prishtinës. Kalimi i tij komplet në një subjekt të ri-të vjetër e vë në dyshim legjitimitetin e tij si kryetar i Prishtinës, ku është zgjedhur si kandidat i VV-së. Këmbëngulja se formalisht ka të drejtë të mbajë postin e kryetarit të Prishtinës, nuk do t’ia përmirësojë prestigjin publik.

Themelimi i partisë së re të të pakënaqurve të ikur nga VV po shoqërohet me thumbime të ndërsjella. E pabesueshme me çfarë padurimi kacafyten ata që deri dje dilnin bashkë në tubime dhe kërkonin vota për të qeverisur Kosovën. Me sarkazëm, shpoti, humor të zi po prijnë jo vetëm anëtarët militantë të VV-së, por edhe funksionarë të lartë të kësaj partie. Mbajtjen e kuvendit të PSD-së në hotelin «Swiss Diamond» mund ta kritikojnë mediat, por me çfarë kredibiliteti e bëjnë këtë aktivistët e VV-së, partia e të cilëve edhe vetë në nivel lokal qeveris me pronarin e hotelit?

Athua politikanët e VV-së dhe pjesërisht të PSD-së po e vërejnë se askush nuk është i interesuar të lexojë se si shahen mes vete, si ironizojnë njëri-tjetrin, si merren me dizajnët e njëri-tjetrit, si mallkojnë njëri-tjetrin?

Zari tashmë është hedhur. PSD pas kuvendit në hotel duhet të dalë në fushë dhe të bind elektoratin. Ndërsa VV më mirë të merret me të ardhmen e saj se sa me baltosje të atyre që deri dje i lavdëronte. Mënyra se si tallen me njëri-tjetrin këta politikanë të kujton një legoland, ku duket se i kanë harruar prindërit pa kujdesin e duhur. VV duhet të kuptojë se vetëm e bën më të zbehtë imazhin e saj nëse ata që deri dje i prezantonte në opinion si ekip të shpresave, sot i përshkruan si përbindësha politikë. Si mund të bëhet dikush menjëherë djall vetëm pse tani s’është në parti me ty? Nëse largimet janë aq të parëndësishme, siç po pretendon kryetari i VV-së, atëherë përse gjithë kjo vëmendje ndaj «tradhtarëve»? Po vazhdoi kjo furi VV rrezikon të irritojë edhe më shumë mbështetës.

Angazhimi politik, e drejta e tubimit, liria e asociimit janë e drejtë e garantuar me ligj. Vlerësimin për secilën palë do ta japë elektorati. Dhe asnjëra palë, as VV, as PSD, të mos kenë shpresa të mëdha se nga kjo përçarje do të dalin më të fortë se ç’ishin kur qenë bashkë. Dhe ndoshta më mirë që nuk janë më bashkë, sepse kështu të papjekur jo vetëm politikisht ata edhe do të mund të vinin në pushtet dhe shteti do të përfundonte në duart e disa njerëzve që tërë ditën e harxhojnë duke keqpërdorur profilet në hapësirën virtuale për të shpotitur njëri-tjetrin e duke komentuar logot. Legolandi politik i Kosovës po bëhet gjithnjë e më interesant, por jo detyrimisht ky është zhvillim pozitiv.