M’i verdhon muret

Foto: Shutterstock



Në shtëpi ka kohë
përgatitet gjella për dy
e më shumë

Rreth sofrës
s’arrijmë të shtrohemi

Ka kohë që buka myket
pa e ngrënë një kafshatë

As rrallë s’po shtrohemi
e hamë njëri-tjetrin

Ka kohë që ia kripim mendjen
vetvetes
me detin pa kripë

Dikush prore m’i verdhon muret shtëpisë
vërtet ka kohë që dua t’ia plas vajit
e qeshem në kupë të qiellit