Katër të arrestuar në Prizren për kontrabandë me njerëz

Me urdhër të Prokurorisë Themelore në Prizren, Policia e Kosovës sot ka bërë bastisjen në shtëpinë e të pandehurit V.L., si dhe kanë arrestuar katër persona, të dyshuar se kanë kryer veprën penale, armëmbajtje pa leje dhe kontrabandim i njerëzve për në vende të ndryshme të Evropës.




Prokuroria Themelore në Prizren, Departamenti për Krime të Rënda, po sot, siç thuhet në një njoftim për media, ka marrë aktvendim mbi fillimin e hetimeve kundër të pandehurve V.L. , S.R., F.L., D.L., R.Sh., A.A., I Q. dhe F.H., për shkak të dyshimit të arsyeshëm se të njëjtit në bashkëkryerje kanë kryer veprën penale kontrabandimi me emigrantë.

Gjatë bastisjes në shtëpinë e të pandehurit V.L., është gjetur një pushkë gjysmë-automatike, një pistoletë Pietro Bereta 7,62 mm, si dhe 46 fishekë të kalibrit 7.62 mm. Të pandehurit dyshohet se në periudhën mars 2015, dhe 22 shtator 2015, si bashkëkryerës kanë bashkëpunuar ngushtë edhe me personat tjerë jashtë Kosovës, të cilët i kanë kontrabanduar viktimat për vende të ndryshme si në Francë, Zvicër dhe në Gjermani.

«Të pandehurit, viktimat kryesisht i kanë transportuar prej Kosovës në drejtim të Beogradit dhe me kalim përmes Suboticës në drejtim të Hungarisë. Gjatë kontrollit, policia ka konfiskuar 4.400 euro të cilat janë gjetur te i dyshuari S.R., ndërsa janë konfiskuar po ashtu edhe tri (3) vetura të markës BWV, një veturë e markës BMW me targa të jashtme si dhe një veturë Honday Teracan me targa të Kosovës», thuhet në njoftimin e Prokurorisë Themelore në Prizren.

Prokuroria bën me dije se të dyshuarit janë arrestuar pasi që ndaj të njëjtëve janë aplikuar masa të fshehta të hetimit dhe në bashkëpunim me drejtorinë kundër krimit të organizuar është kryer kontrolli dhe arrestimi i katër të dyshuarve ndërsa katër të tjerë, për momentin gjenden në arrati.