I brishtë

Amalfi, Itali. Foto: Shutterstock

Një kuti bosh,
një gjethe e rënë
një këpucë e lënë veç,
një foto e zverdhur pa datë,
një festë e lodhur,
një pyetje pa përgjigje,
një faqe e shkulur,
një tenxhere pa kapak,
një varr pa emër,
një tryezë pa bukë,
një petal trëndafili,
një dorë e zgjatur,
një degë e thyer,
një fitil i lagur,
një shqiponjë e kapitur
një pemë e moçme e prerë,
një keqardhje e lehtë,
një fill i trishtë ere,
një grumbull kashte,
një guaskë e zbrazët,
një libër i palexuar ndonjëherë,
një portret i pabesë,
një ëndërr e humbur,
një makinë që po shkatërrohet,
një zhele e shkalafitur,
një mur i vogël suvarënë,
një lule mbi asfalt,
një insenktth i përmbysur,
një vështrim pa dritë,
një tokë pa paqe,
një ditë e bukur e shkuar,
një kujtim i harruar,
një kapelë e humbur,
një krakëllimë kangjele të ndryshkur,
një kapotë e ngrënë,
një fener kurdoherë i fikur,
një ditë mërzie,
një buzëqeshje pa hare,
një karusel i shkretë,
një batanije tepër e shkurtër,
një fustan i dalë mode,
një kalldrëm në rrugë,
një mushama me vrima,
një lavatriçe e flakur në një lëndinë,
një lot që shket,
një relikt mes dallgëve,
një tapë pa shishe,
një flok dëbore që shkrin,
një binar i vdekur,
një fytyrë e tronditur,
një biçikletë pa rrota
një rrugë pa dalje,
një shollë me birë
një stacion i vjetër i braktisur,
një ranishte dimri,
një shpresë që s’kthehet,
një kanaçe e shtypur,
një ballë i djersëtharë,
një letër kurrë e shkruar
një fjalë e pathënë,
një fuçi në det,
një pellg nën diell:
gjithçka, tok me mua,
duket se kërkon dashuri.

Përktheu: B. Njuma