Guraleci

Zbigniew Herbert.



Guraleci është krijesë
e përkryer

i barabartë me veten
i ndërgjegjshëm për caqet e tij

i mbushur tejetej
me kuptim guraleci

me një kundërmim që asgjë nuk të kujton
askënd nuk tremb nuk të ngacmon dëshirën

zelli dhe ftohtësia e tij
janë të drejta dhe shumë të denja

më bren ndërgjegjja
kur e mbaj në shuplakë
dhe trupin fisnik
ia përshkon nga ngrohtësi e rreme

– Guralecët nuk arrijnë të mësohen me ne
deri në fund kanë për të na vështruar
me sy të qetë tepër të qartë

Përktheu: Romeo Çollaku