Familjarët e viktimave të Gërdecit i kërkojnë qeverisë ‹Rama› të mos pengojë drejtësinë

Nëntë vjet pas tragjedisë së Gërdecit, ku u vranë 26 persona, familjarët e viktimave pretendojnë se qeveria shqiptare, dhe jo gjykatat, po vonon dhënien e dëmshpërblimit për tragjedinë që tronditi vendin në vitin 2008.

Edi Rama me familjarët e viktimave të Gërdecit më 15 mars 2010. Foto: LSA



Në një deklaratë për shtyp të mërkurën, Shoqata e Familjarëve të Viktimave të Gërdecit i kërkoi qeverisë «Rama» t’i hapë rrugë zbatimit të vendimeve të gjykatave për dëmshpërblimin e familjarëve të 26 viktimave, të cilët humbën jetën në tragjedinë e 15 marsit të vitit 2008, kur bëhej çmontimi i municioneve në një bazë ushtarake në fshatin Gërdec pranë Tiranës.

Ndërsa u shprehën të zhgënjyer për nëntë vitet e kaluar pa drejtësi, familjarët thanë në deklaratën e tyre se drejtësinë penale ia kanë besuar Gjykatës Europiane për të Drejtat e Njeriut, ndërsa u shprehën se në ‘vetingun’ e tyre të gjithë këtyre viteve gjykatat e kanë kaluar provën, por qeveria akoma jo.

«E dimë që Kryeministri Rama do të përsërisë të njëjtin refren për kalvarin e gjyqeve tona, se fajin e paskan gjykatat… Por për gjyqet e dëmshpërblimeve nuk na i ka fajin gjykata», deklaruan familjarët e viktimave.

«Nga ana tjetër, vetingun tonë nuk po e kalon dot qeveria, e cila mbron shkaktarët e tragjedisë, vonon procedurat duke u ankuar pa fund dhe shtrembëron të vërtetën me të vetmin qëllim që të mohojë gishtin e shtetit në këtë tragjedi, duke mos ndryshuar asgjë nga linja e qeverisë së mëparshme» shtuan ata,  ndërsa sqaruan se drejtësia për ta është vonuar për shkak të ankesave të qeverisë në instancat më të larta gjyqësore edhe pas vendimeve pro dëmshpërblimit të tyre.

Në vitin 2011 përmes një padie civile familjarët e viktimave të shpërthimit kërkuan shpërblimin e dëmit për humbjen e jetës së të afërmve të tyre dhe që të mbahej përgjegjësi nga shteti dhe kompania Albademil.

Këto çështje më pas u transferuan në kompetencë të Gjykatës Administrative, pasi kaluan më parë përmes instancave të ndryshme gjyqësore duke përfshirë në disa raste edhe gjykimin për kontroll incidental në Gjykatën Kushtetuese në vitin 2012, gjykimet për kompetencën lëndore në Gjykatën e Lartë në vitin 2014.

Pas kalvarit të gjatë gjyqësor, më 25 janar 2017, Gjykata Administrative e Apelit mori vendimin e parë, i cili i hap rrugën kërkesave të tjera të familjeve të të vdekurve dhe të të plagosurve të Gërdecit.

«Sot është vërtet vonë, por jo aq vonë sa Kryeministri Rama të mos gjejë dot pak forcë që të shfrytëzojë shancin e fundit dhe të kalojë vetingun tonë. Sigurisht që ai ka të drejtë të ketë të njëjtin mendim si paraardhësi i tij, por të paktën t’i japë fund futjes së pengesave në rrugën e drejtësisë së pashmangshme dhe t’i hapë rrugë ekzekutimit të vendimeve gjyqësore» e përfunduan familjarët e viktimave të Gardecit deklaratën e tyre.

Ashtu si qeveria «Berisha», qeveria aktuale e ka kundërshtuar dëmshpërblimin për familjarët, si dhe përgjegjësinë e shtetit.

(https://www.reporter.al/familjaret-e-viktimave-te-gerdecit-i-kerkojne-qeverise-rama-te-mos-pengoje-drejtesine/)