110 zyrtarë serbë zhdukën dëshmitë për krime të luftës në Kosovë

Fondi për të Drejtën Humanitare (FDH) ka publikuar një dosje mbi krimet e luftës në Kosovë.

Kamion i gjetur në Serbi, me të cilin ishin bartur kufomat e shqiptarëve të Kosovës pas luftës.



Që nga viti 2001 deri më sot në territorin e Republikës së Serbisë janë gjetur varreza masive në katër lokacione me trupat e pajetë të 941 shqiptarëve të Kosovës. Ata, theksohet në një dosje të Fondit për të Drejtën Humanitare nga Beogradi, janë vrarë në Kosovë në vitin 1999 dhe bëhet fjalë kryesisht për civilë të ekzekutuar jashtë luftës.

Fondi për të Drejtën Humanitare në këtë dosje të prezantuar të martën në Beograd numëron emrat e 110 zyrtarëve serbë, të cilët dyshohet se nga marsi deri në qershor 1999 ishin të përfshirë në zhdukjen e dëshmive për krime të luftës në Kosovë. Fondi thekson se Slobodan Millosheviqi i dha urdhër ministrit të atëhershëm të policisë Vlajko Stojilkoviqit për të «sanuar terrenin», siç përshkruhej me gjuhë burokratike zhdukja e gjurmëve të krimeve me qëllim që fajtorët të shpëtonin nga ndjekja penale.

Në fshehjen e kufomave të 940 shqiptarëve në katër varreza masive ose djegien e tyre në tri lokacione kanë marrë pjesë krerët e atëhershëm shtetërorë, policorë, ushtarakë, pjesëtarët e mbrojtjes territoriale dhe punëtorët e ndërmarrjeve shtetërore dhe publike, nënvizohet në dosje.

Sipas Fondit dosja më e re për krimet në Kosovë dhe fshehjen e kufomave të shqiptarëve është përpiluar në bazë të dokumentacionit nga Tribunali i Hagës, Gjykatës vendore mbi krimet e luftës dhe nga burime të tjera. Zyrtarë të Fondit thanë se kanë arritur të zbulojnë pjesën më të madhe të skemës së fshehjes së kufomave, por «sekretin e plotë» mund ta zbulojë shteti.

Në bazë të hulumtimit të Fondit nga lista me 110 zyrtarë që kanë marrë pjesë në fshehjen e gjurmëve të krimeve ka edhe persona që janë aktivë në jetën publike, ndërsa shumica e të dyshuarve për krime kalojnë ditë të qeta në pension. «Deri më sot në Serbi askush nuk ka dhënë përgjegjësi për operacionin e gjerë të fshehjes së trupave të shqiptarëve të Kosovës në varreza masive», njofton Fondi për të Drejtën Humanitare. Në varrezat masive të Batajnicës, Petrovo Selos, afër liqenit Peruçac dhe në varrezën masive Rudnica nuk ekziston asnjë shenjë që tregon se aty janë gjetur qindra kufoma të grave, fëmijëve dhe burrave civilë të vrarë në Kosovë. (-lli)